24.11.2025
უცხოელი სტუმრები ანთროპოლოგიური კვლევის ლაბორატორიაში
ივანე ჯავახიშვილის სახელობის ისტორიისა და ეთნოლოგიის ინსტიტუტის ანთროპოლოგიური კვლევის ლაბორატორიას ამერიკის შეერთებული შტატების სამხრეთ კავკასიის კვლევის ინსტიტუტის დირექტორის მოადგილე, ცნობილი ბიოარქეოლოგი და ანთროპოლოგი, ილინოისის უნივერსიტეტის მკვლევარი მორინ ელიზაბეთ მარშალი ეწვია. ლაბორატორიის ხელმძღვანელმა, ისტორიის მეცნიერებათა დოქტორმა - ლიანა ბითაძემ ამერიკელ მეცნიერს, ასევე, ანთროპოლოგებს იტალიიდან, გერმანიიდან და სხვა ევროპული, ახლო აღმოსავლეთისა და ამიერკავკასიის ქვეყნებიდან, დაათვალიერებინა ლაბორატორია, გააცნო აქ არსებული მნიშვნელოვანი კრანიოლოგიური კოლექცია და ლაბორატორიაში მიმდინარე კვლევები.
ანთროპოლოგიური კვლევის ლაბორატორიაში თავმოყრილია სამხრეთ კავკასიაში ყველაზე სოლიდური კრანიოლოგიური კოლექცია ძვ. წ. IV ათსწლეულიდან თანამედროვე მცირე სერიების ჩათვლით, რაც ანთროპოლოგიის სხვადასხვა მიმართულებით კვლევების ჩატარების შესაძლებლობას იძლევა. ლაბორატორიის ხელმძღვანელის ლიანა ბითაძის ინფორმაციით, კვლევები მიმდინარეობს საქართველოს ტერიტორიაზე განსახლებულ მოსახლეობაზე სივრცესა და დროში, დაგეგმილია რამდენიმე ახალი პროექტის განხორციელება.
მსოფლიოში ცნობილი ანთროპოლოგები საერთაშორისო სამეცნიერო კონფერენციაში - „სამხრეთ კავკასიის ბიოარქეოლოგია“ მონაწილეობდნენ, რომელიც თბილისში გაიმართა და რომლის ორგანიზატორი ამერიკის შეერთებული შტატების სამხრეთ კავკასიის კვლევის ინსტიტუტია.
