სიახლეები

16 ივნისს, 14:00 საათზე, თსუ ივ. ჯავახიშვილის სახელობის ისტორიისა და ეთნოლოგიის ინსტიტუტში გაიმართება სამეცნიერო პროექტის - „საქართველო და ბიზანტიური თანამეგობრობა: პოლიტიკა, კულტურა და იდენტობა იმპერიის საზღვრებზე (XI საუკუნე)“,  შედეგების პრეზენტაცია.

შ. რუსთაველის ეროვნული სამეცნიერო ფონდის მიერ დაფინანსებული საგრანტო პროექტი  - „საქართველო და ბიზანტიური თანამეგობრობა: პოლიტიკა, კულტურა და იდენტობა იმპერიის საზღვრებზე (XI საუკუნე)“  შესრულებულია  თანამედროვე ბიზანტინისტიკაში ფართოდ განხილვადი კვლევითი კონცეფციის  ფარგლებში. 

პროექტში განხილულია შემდეგი საკითხები: რამდენად განსაზღვრავდა ბიზანტიური ზეგავლენა ახალგაზრდა ქართული მონარქიის პოლიტიკური სუვერენიტეტის ხარისხს,  იმდროინდელი საქართველოს პოლიტიკური და კულტურული ელიტის სახელმწიფოებრივ, რელიგიურსა და კულტურულ იდენტობებს, რა მექანიზმებს იყენებდნენ ბიზანტიური განათლების დაუფლებისა და იმავდროულად  სუვერენიტეტის შენარჩუნებისათვის.   

პროექტში მონაწილეობდნენ ხელნაწერთა ეროვნული ცენტრის მკვლევრები: მზია სურგულაძე (პროექტის ხელმძღვანელი), ისტორიის დოქტორი; თამარ ოთხმეზური, ფილოლოგიის დოქტორი;  მაია მაჭავარიანი, ფილოლოგიის დოქტორი; მზია ჯანჯალია, ხელოვნებათმცოდნეობის დოქტორი, გ. ჩუბინაშვილის ხელოვნების ისტორიისა და ძეგლთა დაცვის ეროვნული კვლევის ცენტრის მთავარი მეცნიერი თანამშრომელი; გიორგი ჭეიშვილი, ისტორიის დოქტორი, თბილისის სახელმწიფო უნივერსიტეტის ივ. ჯავახიშვილის სახელობის ისტორიისა და ეთნოლოგიის ინსტიტუტის მთავარი მეცნიერი თანამშრომელი და ნათია დუნდუა (პროექტის კოორდინატორი), ილიას სახელმწიფო უნივერსიტეტის გიორგი წერეთლის სახელობის აღმოსავლეთმცოდნეობის ინსტიტუტის ასოცირებული მკვლევარი.

დრო: 16 ივნისი, 14:00 საათი

მისამართი: უნივერსიტეტის ქ. N2, კორ. 11 (თსუ-ს ბიბლიოთეკის მიმდებარედ)

დასწრება თავისუფალია.